Քրիստինան ծնվել և մեծացել է Ստեփանակերտում։ 2023 թվականին բռնի տեղահանվել է Արցախից և հաստատվել Երևանում։ Քրիստինան մասնագիտությամբ իրավաբան է, սակայն տեղահանումից հետո համապատասխան աշխատանք չգտնելով, չի ընկճվել և որոշել է սովորել նոր մասնագիտություն` մռայլ օրերը հաղթահարելու և նոր աշխատանք ձեռք բերելու համար: Արցախում ինքնուսույց էր և զբաղվում էր կարուձևով, իսկ Երևանում արդեն մասնակցել է հագուստի մոդելավորման, կարուձևի և կոնստրուկտավորման վերապատրաստման դասընթացների։ Երբ արդեն վստահ էր իր մասնագիտական կարողությունների վրա, որոշեց հիմնել սեփական բիզնեսը։ Նա կարում է սեղանի սփռոցներ, անձեռոցիկներ, խոհանոցային սրբիչներ, մանկական ծածկոցներ, դեկորատիվ բարձեր և պայուսակներ։

Քրիստինայի նպատակն է տարածել հայկական մշակույթն ու կարարվեստը՝ իր սփռոցների վրա ասեղնագործելով արցախյան գորգանախշերը, Մարաշի և Ուրֆայի կարատեսակները։ Ներկայումս նա պլանավորում է սովորել ասեղնագործություն՝ երազանքն իրականացնելու համար։ Իր աշխատանքներում կարևորում է ստեղծագործական մոտեցումը՝ յուրաքանչյուր ապրանքի հաղորդելով սեփական ճաշակն ու անհատականությունը։ Շուկան մանրակրկիտ ուսումնասիրելուց հետո ստեղծել է այնպիսի աշխատանքներ, որոնք եզակի են շուկայում։ Հումքը նախընտրում է միայն բնական գործվածքներից՝ վուշ և բամբակ։

Ապագայում նրա նպատակն է հիմնել հագուստի արտադրամաս և հանդես գալ որպես մոդելավորող։ Ցանկություն ունի 3-5 տարվա ընթացքում արտադրել կանացի հագուստ և արդեն աշխատում է այդ ուղղությամբ՝ ստանալով համապատասխան կրթություն։

​

Քրիստինան ունի արցախցիներին հատուկ տոկունությունը և հաստատակամությունը,և հիրավի այս հատկանիշների շնորհիվ մենք ապագայում էլ առիթ կունենանք ուրախանալու և հպարտանալու նրա հաջողություններով: