Ատուր Պոսթահյան
Արծաթագործ
Ատուրը հաստատվել է Հայաստանում 2015 թվականին։ Փաստացի այդպես է, բայց ինքը համաձայն չէ։ Նա
իրեն հայրենիքի մի մասնիկ համարում էր դեռ շատ վաղուց։ 90-ականներին տարբեր մշակութային ծրագրերով
Հալեպից հաճախ նվիրյալների խմբով այցելում էին Հայաստան՝ իրենց աջակցությունը բերելով այն ժամանակ
բազում հոգսերի տակ կքած բազմաչարչար հայրենիքին։
Ատուրը ծնվել է Արևմտյան Հայաստանից գաղթած և Հալեպում ապաստանած գաղթականների ընտանիքում։ Մեծ
հայրը կարողացել է իր սերունդներին փոխանցել սերը հայրենիքի նկատմամբ։ Ատուրը պատմում է, որ դեռ վաղ
մանկուց իր երազանքն էր հաստատվել հայրենիքում։ Հիշում է իր մանկական առաջին հեծանվով մտովի
տեղափոխվելը Հայաստան և շրջելը փողոցներում՝ իբրև իրեն քաջ ծանոթ վայրերում։
Ատուրը ոսկերիչ – արծաթագործ է։ Պատրաստում է հիմնականում արծաթյա զարդեր։ Սիրում է իր աշխատանքը
և յուրաքանչյուր զարդի մեջ դնում իր ձեռագիրը։
Ասում է, որ ինտեգրվելու խնդիր երբեք չի ունեցել։ Երբ Հայաստանում է, իրեն տանն է զգում։
